Fäeag Rotuam

Maj te’is Human Rights Commission pā a’fḁim ‘e ‘äea, ne ‘ou kḁu’ḁpiḁg ta ne kḁu tḁunḁ’iḁg ta, la ‘inean tē ne ‘äe agtḁu ma ‘e av ne ‘äe ao garue; ne av ne ‘äe kat tög tatḁu ra ma le’et ne a’sok ‘e kḁinag garue ‘eseat ma ne ‘äe a’soko; ‘ou ut garueag ta ma te ka ‘äe noh pär ka ū ‘e täe; ‘on la nāag ma pōag ne fuḁg fakgarue lamlama ‘e ‘ou ut garueag ta; ma sal ne hḁiasoag la ‘ut’ḁkia måür fakgarue se rere.

Tei ka ‘äe famӧr garue Pasefiket? Te’is sal ne ‘äe la pō la ‘es väeag.

‘Ḁmis pā ‘es ka tår rogrog ma a’häe tūtū ‘atakoa ne täla leum ‘e famör garue Pasefiḁk ne garue ‘e maj fakgarue fol ‘i: Manufacturing (Maj ne fup’åk ma rēem tē la tög’åk), Construction (Maj ne fū’åk kḁinag rī tūtū) ma Health (Maj ne måür fakforo).

Kamatam ‘e 19 Julai 2021 se 30 Novempa 2021, ‘äe la pō se’ ma la få’ pukum se ‘ḁmis, ne nāam ta ‘ou email het, ne a’es’ao’åk ‘e sal te’is – tweet, ne he’om se ‘ḁmis ‘e telefon ta, ne sik ma nāam ta mḁl rueruet, ne la’ se ta tḁunḁ’it ‘e tḁunå’ ne la fḁi la a’sok ‘e ut tūtū ne hanue te’is.

 

Pā ‘inea rogrog hoi’åk, sḁkior se website te’is pacificpaygap.hrc.co.nz 

Email pacificpaygap@hrc.co.nz  

He’ se 0800 496 877  

Tḁupir se Human Rights Commission ‘e Facebook, Twitter, LinkedIn, ma Instagram

pacificpaygap@hrc.co.nz

Muitua ke he Human Rights Commission he Facebook, Twitter, Linkedin mo e Instagram.

Ka tes ta Pacific Pay Gap?

Pacific Pay Gap täe tūtū ma hḁisiriḁg ne tög ne famör garue Pasefika pō nōnō ka la a’tatḁu’åk se tög lamlam pḁut ne famör garue ne hat se kḁinag tūtū ne tore pō ‘e Aotearoa Niu Sirḁgi – fak se fā fis ne Niu Siråg ‘i. Te’is ‘on kelkeleag ne tē ‘i:

Ka tes ta Sḁkior Tēet se ‘amnåk te’is Pacific Pay Gap?

Maj te‘is Humans Rights Commission täla a’sokoa sḁkior tē te’is la ‘inea totonuen ‘on hün ne famör garue Pasefika kat tög tatḁu ra ma te’ ne famör garue ne tore.

 

Iris pā ‘inea tape’ ma tē ne pesnese a’soko, ma tē ne iris pō se’ ma la a’sok, la ‘ut’ḁkia se muḁ ‘on la pōag ne ta garuet se famör garue Pasefika; la pō la hḁisiriḁg ma tūtū ne tög ‘on famori la sḁkior ma räe, ma la ao potoa la a’leleia, ma toak’åk pḁua.

 

Sḁkior tē te’is täla sḁkior ma rē a’häe se tē ne famör garue Pasefika agtḁu ma ‘e maj fakgarue fol ‘i:

 

  1. Manufacturing – Maj ne fup’åk ma rēem tē la tög’åk
  2. Construction – Maj ne fū’åk kḁinag rī tūtū
  3. Health – Maj ne måür fakforo

Ka tes ta ‘ḁmis pā pō ‘e Sḁkior tē te’is?

Sḁkior tē te’is täla hḁiasoagan ma a’vavhinaen se Human Rights Commission la räea tēkäe ma ut tūtū ne kop la io sin la a’leleia ma toak’ḁkia hḁisiriḁg ne tög ‘on famör garue Pasefika ‘e famör garue ne tore ‘e pesnese ma kampanē. Rogrog ma räe tē ne la pō ‘e sḁkior tē te’is la ‘es’ao tape’ ma se ‘amnåk ma garue ne la ao potoa ökök ne agtḁu se kḁinag famör ne tore

Ka pō ‘e tese tä tē te’is hele’ la täe se ‘os ‘es puer ma ne’ne’ fakfamori?

Famör garue Pasefika ma ‘oris ‘es puer ma ne’ne’ fakfamör la fak ma se famör ‘atakoa ne tore:

  • la tög tatḁu ma ta le’et ne a’sok ‘e kḁinag garue ‘eseat ma ne ‘äe a’soko,
  • la nāag ne garue ma fuḁg fakgarue la säe ofrḁu se te’ ne kḁinag famori ma a’tu’å ra ta le’et,
  • la noh pär ka ū ‘e kḁinag garue mam’asa ne ag koko, ma la noh sḁi ‘e kḁinag ag ne la fir’åk ma a’tū’åk famör ‘e ut garueag ta.

‘Es puer ma ne’ne’ fakfamör ‘i a’fūmou’åk fakfoh ma pär ka åf’åk ‘e foh ne Niu Sirḁgi ma ‘e foh ofrḁu ne rån te’is ne matanitū Niu Siråg ta a’fūmou’åk fakgarue, ma täe iris kop la tḁupir ma a’sok la fak ma sin.